文仙尼變陣成功　意大利大炒土耳其

周二(29日)凌晨歐國聯A1組第2輪，意大利作客以4比1大勝土耳其，近7年首次淨贏3球或以上，新帥文仙尼取得回巢後首場勝仗，意軍2位新星比奧艾斯保薛圖、米高卡約迪表現搶鏡，合力創造3入個波，文仙尼改革初步見成效。

意大利上仗0比2不敵比利時，主帥文仙尼今仗對正選陣容作出多8個變動，果然立竿見影，開賽9分鐘，中堅巴斯東尼接應角球，射入打開紀錄。米高卡約迪喺禁區右路起腳，被土耳其門將巴恩迪亞撲出不遠，大衞法迪斯補射入網。

跟住比奧艾斯保薛圖橫傳，米高卡約迪喺同樣位置再次射門，自己都入番1球，呢位效力賓福特嘅22歲右後衞首次為意大利上陣，就創造2個入波，當時只係上半場27分鐘，意大利自2021年9月後，首次開賽半小時內入3球。

換邊後唔夠2分鐘，土耳其憑前鋒巴列斯耶馬斯射入追番1球，但門將巴恩迪亞傳波失誤，被意大利截到打反擊，辛度東拿利射門中柱彈出，比奧艾斯保薛圖飛身補頂入網。呢位21歲國際米蘭前鋒今仗入1球及1次助攻，並且同門將基安盧基當拿隆馬、辛度東拿利成為僅有3位連續2場歐國聯擔任正選球員，可見已成為文仙尼心目中嘅絕對主力。

賽後文仙尼話：「我哋會盡快恢復體力，為下場作客法國做好準備，我哋有好多年輕球員，佢哋充滿活力，已經準備就緒。」至於土耳其2戰2敗，意大利籍領隊蒙迪拿帥位愈來愈危。