麥總重創法國贏波代價大

尋日凌晨歐國聯A1組，法國新帥施丹首仗領軍出擊，作客以1比0擊敗土耳其，旗開得勝。

施丹排出433陣式，由基利安麥巴比、米高奧利斯、奧士文尼迪比利組成鋒線，創造唔少具威脅攻勢，雙方上半場互無紀錄。戰至54分鐘，麥巴比射入全場唯一入波，佢今年已為國家隊入12球，追平自己保持嘅21世紀法國單年最多入波球員紀錄，但係「麥總」亦因為今次射門，整傷左膝退下火線。

即時退隊施丹擔憂
賽後施丹對於麥巴比傷勢感到擔憂，佢話：「麥巴比情況唔多好，非常遺憾，我認為佢需要提早返回球會，唔想佢冒任何風險。」其後法國足總亦宣布，麥巴比因為膝部肌腱受傷已經退隊，無緣未來3場歐國聯，包括先後對比利時及意大利嘅硬仗。