利物浦關注自家棄將　競爭對手多達6隊

利物浦去年將自家青訓產品泰拿摩頓賣畀里昂，該英格蘭小國腳中場迅速喺法甲站穩陣腳，上季上陣43場入2球3助攻，成為里昂必然正選，據報泰拿摩頓嘅出色表現引起利物浦關注，同時另有6支英超球隊對佢有興趣，泰拿摩頓重返英超指日可待。

泰拿摩頓2021年升上一隊後，共為利物浦上陣14場，並無入球，期間外借到英冠布力般流浪及侯城，去年8月轉會里昂，轉會費總值1,500萬歐元，利物浦有20%二次轉會分帳。

利物浦今季換帥，23歲嘅泰拿摩頓表現成功吸引新帥伊拉奧拿注意，有意重召佢歸隊，不過想回購該球員絕非易事，據報共有多達6支英超球隊對佢有興趣，計有諾定咸森林、水晶宮、白禮頓、紐卡素、新特蘭同愛華頓，競爭激烈，作為母會嘅利物浦，想重召「親生仔」就要落多啲嘴頭先得。