[东方报]歐國聯：高普省招牌追打落水狗 德國搶韁半場起塞

今晚歐國聯A2組焦點戰，德國主場硬撼塞爾維亞。德國新帥高普上任後，竟然兩場未贏過，難得遇上連場落敗嘅塞爾維亞，不容再失，好彩佢哋主場出擊例搶韁，有力先發制人，半場主勝趁早買。（周五凌晨2時45分開賽）

無論以往執教多蒙特抑或利物浦，高普都能按自己步伐進行重建，並帶領球隊走出谷底，但勢估唔到今次接手德國咁難搞。首仗大部分時間領先之下，補時畀荷蘭逼和1比1，尤其係下半場被「橙軍」圍攻，唔輸都偷笑；上仗返主場鬥希臘，佔盡上風卻冇乜入肉攻門，反而客軍1次反擊足以致命，係德國史上首次輸畀希臘，冇晒飛士。

始終國際賽備戰時間短，高普要將其高位逼搶植入確係唔易，由於佢一口氣徵召44人分兩份名單，因此今仗同下輪作客希臘，德國會起用第2份名單嘅球員，呢班人默契更少，但鬥心可能更強，例如馬歷泰奧、沙特艾馬拉、真拿達、湯比斯卓夫等新仔難得有機會，一定搏到盡，配合域斯、卡廉艾迪耶美、禾達美迪等帶住，實力唔曳。

塞爾維亞4連敗
另邊廂，塞爾維亞雖然有盧卡祖域、杜辛泰迪治等助陣，但整體人腳參差，而且近4場全部輸晒，包括歐國聯頭兩輪先後不敵希臘同荷蘭，其中3場上半場落後，可見初段未站穩陣腳常被對手得逞。咁啱德國主場例搶韁，近5次主場出擊4次上半場領先，高普唔想做「日耳曼兵團」史上首位頭3仗不勝教頭，今仗遇弱必定一開波即全力撲擊，可由頭贏到尾開齋。