C朗憤然離開國家隊　揚言將爆大鑊

C朗「坐冷板」事件愈演愈烈，呢位41歲射手同葡萄牙主帥佐治捷西斯、足總會長柏度普安卡「三方會談」破裂，憤然離開國家隊，無緣周五(2日)凌晨歐國聯作客丹麥，以及3日之後主場對挪威，C朗揚言將於適當時候公開退隊真相。

葡萄牙上場歐國聯作客以2比1擊敗挪威，C朗近18年來首次全場喺後備席坐冷板冇上陣，當時已見到佢面露不悅。其後傳出C朗同領隊佐治捷西斯有爭拗，足總會長柏度普安卡緊急飛赴丹麥首都哥本哈根嘅集訓大營調解紛爭，但結果不歡而散。

C朗決定離開國家隊：「聽完國家隊領隊出席記者會一番說話，加上同足總會長交談後，我決定離開集訓大營，將於適當時候向葡萄牙人交代離隊真相，現時祝願葡萄牙同隊友好運。」C朗家姐Elma幫口，話細佬應該獲得更多尊重。

有消息指C朗缺席近日操練，佐治捷西斯澄清對方並冇罷操，並且接受任何安排，包括擔任後備。至於點解C朗最終仍然決定離隊，佐治捷西斯承認原本打算上仗畀佢後備入場踢30分鐘，但因為當時戰局需要1位有足夠活力前鋒喺前場牽制，所以改變主意，明白C朗喺場邊熱身太耐都冇得上陣，可能感到唔開心。

另外，葡萄牙媒體《球報》指佐治捷西斯喺記者會講明自己擁有戰術部署絕對權力，任何球員都唔可以改變佢，因而激嬲C朗。

C朗為葡萄牙上陣234場入146球，兩項數據都係球隊史上最多，經過今次將帥決裂後，呢位老將國家隊生涯好大機會終結，葡萄牙早前歐國聯主場贏威爾斯1比0，C朗踢咗67分鐘被換走，該仗可能成為佢嘅國家隊「告別戰」。