[东方报]友誼賽：新帥爭表現博長約 南韓上盤靠得住

今晚國際熱身賽，南韓於主場迎戰厄瓜多爾。兩隊同樣換咗領隊，其中「太極虎」搵來羅拔圖摩蘭奴接手，佢為博長約，誓要擊敗厄瓜多爾立威，讓平半照撐上盤。（周四晚7時開賽）

南韓經歷今夏世盃分組賽出局嘅失敗，之後仲爆出2024年委任洪明甫出任領隊時，有黑箱作業之嫌，就算佢世盃辭職亦風波未平，因此今次起用邊個接手要小心處理，經過多人遴選後，最終決定用羅拔圖摩蘭奴做臨時主帥，去到11月為止，只有6場試用期。

羅拔圖摩蘭奴喺2018年以副手身份入主西班牙，但翌年佢阿頭安歷基因家事離任，佢暫代主帥更連場報捷，一度以為會坐正，點知後來安歷基回歸，卻即刻將佢趕走，認真陰功豬，上年執教PFC索契，又被指因過度沉迷使用AI教波而被炒。難得今次獲得「太極虎」試用，羅拔圖摩蘭奴為博「轉正」必須喺短時間內交出成績，孫興民、金玟哉、李康仁等悉數入選，強陣出擊。

厄軍主力缺陣大影響
厄瓜多爾雖然喺世盃殺入32強，但都決定易帥，由阿根廷名宿馬些路加拿度接手，佢亦徵召佩華斯艾斯度比倫、威廉柏曹等世盃國腳，不過車路士中場摩西斯卡些度因傷落選，對球隊影響甚大，加上戰意難與處於試用期嘅羅拔圖摩蘭奴相比，「太極虎」挾近3次主場全勝之勢，有力贏波。